في جمهورية الرعيان,طلعت ارهابي

اعذروني اليوم عالصور شويه مقصر وياكم , بس عندي شغل وهمزين لحكت اكتب "بعيد عنكم امتحانات نص السنه"

طالع بسيارتي , فاتح الجامه بعز البرد , لان اذا فتت من يم ابو السيطره وانت مصعد الجامه , يجلب بيك تعال ليش متنزلها!طبعا همه مو لاسباب امنيه , هي جامه , قابل اذا سيارتي مفخخه مراح تشضي عليهم اذا فاتح الجامه؟

بس هي خباثه , شلون هو واكف بالحر او بالبرد وانت ساد الجامه ومشغل تبريد لو مشغل تدفأه؟

على كولة المثل:هي دوده صغيره , بس تهجم بيوت!

كول والله فتت, خففت السرعه كلش كلش, شفت ابو الحرس يباوع عليه , هم ماجذبت خبر وكفت.

الحرس:الله بالخير

اني:الله بالخير والبركه , هلا عيني"اني ابد ماذب اللو على الحرس!

الحرس:وين متوجه؟

اني:لبيتنه.

الحرس:وين بيتكم؟

اني:هذا الي انته واكف عالطرمه مالته , متتذكر انه انتو نصبتوا سيطره بحديقة بيتنه؟

الحرس:لك متشاقي وياك اني؟

اني:اعذرني عيني , بس انت دايس على الورده الي زرعتها الوالده , ولو بس تدري شلون ترزلت واني صغير لان مره طخيتها بالطوبه!

الحرس:تتشاقى مو؟افتح الصندوك.

اني:نزلت فتحت الصندوك.

الحرس:هاي شنو وين السبير "التاير الاحتياط"

اني:والله انشك وماعندي فلوس اشتري, تدري زوج التايرات بميه وشويه , واني راتبي عله كدي مو مثلكم الله رازقكم.

الحرس:تحسدني مو؟هو انتو هيج الارهابيه , لان انتصرنا عليكم بالدعايه مال التلفزيون بعد متعرفون شتسوون كمتوا تحسدون بينه.

اني:يابه توكل بالله يا ارهاب يا بطيخ؟

الحرس:تدري اليوم ذكرى وفاة منو؟

اني:اي اليوم ذكرى استشهاد الامام الحسين "رض"

الحرس:شمدريك؟

اني:بغداد كلها مكلوبه مشايه وقطع سوده , يعني شمدريني؟

الحرس:اني اشك انك انت متواطئ بعملية قتله.

اني:لك يابه الرجال استشهد من 1420 سنه , اني شلون كتلته؟

الحرس:وين جنت متواجد البارحه؟

اني:بالكوفه.

الحرس:اذن انت اعترفت بلسانك , جنت وي الي مسوين كمين للحسين , ارفع ايدك وسلم سلاحك , وهسه تجي الهمر وانقلك للسيد الضابط يشوف شيسوي وياك.

اني:يمعود عدل بدل؟

بهاي الاثناء دك الحرس الباب على امي , عبالي ديكوللها هذا ابنكم بعد لتخلوا يطلع.

الحرس:يوم لكينه ارهابي ونريد نحبسه بغرفة الخطار مالتكم لما يجي سيادة الضابط يتفاهم ويا.

اني كلت هسه امي تتوسل بي وتبجي شويه حتى يهدني , اشو هاي مجذبت خبر , وطكتها بهلهوله.

وكللللللللللللللللللللللللوش , لكيتوا الارهابي؟

الحرس:اي يوم لكينا وجان ناوي يختل ابيتكم.

امي:الله يقويكم ولدي , انتو الي تحافظون عالعراق.

اني:يمعوده يوم هسه وكت شقه؟ اني ابنج ارهابي شنو؟

امي:انت مشايف الدعايه الي بالتلفزيون مال هذا الي ميقبل يزوج بنته لواحد ارهابي؟انت هم مادام ارهابي , فلا اعرفك بعد ولاتعرفني.

عينك متشوف اللا النور , فوتني الحرس لغرفة الخطار دفرات!

وهسه اني داكتب هذا الموضوع من التلفون واني محبوس بغرفة الخطار!

اكلبوا احتلونا الايرنيين

يابه ماضل احد ماقرا خبر احتلال كم جندي ايراني لبئر النفط رقم 4 والمسمى بئر فكه "اي هي نفسها صرافه"

الخبر يكلك اكو 11 جندي , اي مو 11 الف , بس 11 واحد جيتوا من الحدود , واحتلوا حقل نفط , وهسه ديبيعون بالسوك السوده التنكه ب2500

بواري نفط مزنجره

يابه مدري كم مية الف جندي عراقي , ومدري كم ميت الف جندي امريكي , وطياراتنا وطياراتهم , ودباباتنه ودباباتهم , وخابصينه , تاليتها 11 جندي باكو نفطاتنه!

هاي منو جذب عليكم كاللكم عدنه نفط؟

يابه هذا الحقل مالتهم

اجتمع المتحجي "الجذاب مال الحكومه" مع مجلس الامن الوطني لشئون الرعيان مع رئيس جمهورية الرعيان القائد العام للقوات المجولحه , وبعد مناقشة الاوضاع اصدر رئيس الرعيان ابو اسراء الكلام الاتي:

اهلا بيكم شباب, اتمنى عجبكم الكيك مال مرتي؟

اليوم دنتفاهم بخصوص هذولي الايرانيين الي جيتوا من فوك السياج, شنو السالفه اشو خبصوني المواطنين؟

واحد قفاص"من الحبربشيه":سيدي كلشي ماكو وداعت شاربك اشاعه مغرضه بحق جمهورية الرعيان.

واحد اللاخ:سيدي هذولي طفروا ديجيبون الطوبه , ديلعبون تك كول , وطفرت الطوبه , يعني شلون يبطلون يلعبون؟

رئيس جمهورية الرعيان: خايب دكعد! طوبه شنو؟ هذا منين جايبي هذا؟

عبود قنبر"قفاص غبي":سيدي هذا ابن خالتك الي جان احسن لاعب بشارعكم.

الرئيس:هاااا عرفته , كملوا.

واحد لاخ:سيدي انت ليش مضوج نفسك ؟ اشو هو نفط ومكوم.

رئيس الجمهوريه:اي صدك والله , احنه شلنه بي؟عدنا هويه من عنده , بس خطيه هذولي هم جوارين , وتدرون حك الجيره.

زين يرادلهم فد واحد جذاب اصلي مال ايام زمان , فراحوا جابوا جذاب جمهورية الرعيان:

الدباغ , الجذاب مال جمهورية الرعيان

الدباغ علق قائلا لمدونة جمهورية الرعيان:

ليس هنالك اي احتلال او اي شيئ اخر من هذا القبيل , هذا الامر كله اشاعات مغرضه من قبل البعثيه والصداميه والتكفيريه السلفيه الوهابيه والدول المجاوره و "تيم اثيل"  , ونحن نحب جارتنا ايران , واذا ارادت في اي وقت فما عليها الا ان تطلب ونحن سنعطيها ماتحتاجه من النفط.

اما عن برلمان عشيرة ال مصلخ , فقد اجتمع لتدارس المسئله , وقد اوضح النائب صلبوخ الملصلخ ان الجلسه كانت ناجحه جدا , وقال:
"نحن لا نعلم مالذي حصل بالضبط , احنه ملتهين نلغف اكثر منكدر قبل متصير الانتخابات , لكن على كل حال نحن نناشد ونستنكر ونشجب ونهنأ"

فضوها عاد اريد اخابر صاحبتي

زين السيد رئيس الرعيان , اذا جنودك جوه العراق مضابطيها , عالحدود مضابطيها , لعد متكلي شديسوون؟

طلعت اني كاتلهم للعراقيين

الله بالخير:

 نوري المالكي , رئيس جمهورية الرعيان وفي اخر تصريحاته , اتهم سوريا بالمسئوليه عن النفجارات الثلاثاء الاخيره

هذا الي يوازيك على الجكاير

سؤال حضرة رئيس الرعيان

انت موضف تلترباع الشعب العراقي بالجيش , لعد وينهم جنودك؟

ويوميه مهوبز علينا , وخطة فرض القانون ومدري شنو

اني اشك خطة فرض القانون جانت ضدي شخصيا , اشو يوميه الجنود مجيتين علينا بالليل , لو بس ادري ماعدهم غيرنا؟ميروحون يفتشون بيت ابو يوسف , بيت ام احمد الحفافه , لو بس كادرين عليه؟

شغله اللخ , هذني سيطراتكم شيسوون؟

اشو بس اباب بيتنه 3 سيطرات, بديت افكر انه اني مصدر الارهاب

حلوه لحيتي مو؟

اما طارق الهاشمي فذب الصوج براس المالكي, يكله انت مو الرئيس وتفيك علينه , واني واني , ودولة القانون ومدري شنو؟وينك وين جوالاتك؟

مثل متعرفون , بجمهورية الرعيان , كل واحد يجر بصفحه!

طارق الهاشمي يكله لنوري المالكي , اذا متكدر عليها , عزل احسنلك , طبعا هو يريد هو يصير الرئيس , تدرون حلو واحد يصير رئيس جمهوريه "حتى اذا جمهورية الرعيان

احنه شنكله لنائب رئيس جمهورية الرعيان؟نكله مو انت النائب مالته, انت وين جوالاتك؟ولم ملاعيبك والعب بيها بعيد , لان نوري كمش الرئاسه بعد , وميفكها لو يجي الريل!

عبود قنبر , لغاف مفصول

هذا الي بالصوره عبود قنبر , من صارت خطة فرض القانون , عينه نوري المالكي رئيس جمهورية الرعيان مسئول عن الجيش في بغداد, البرلمان"مجلس عشيرة ال مصلخ" كمشوا حققوا ويا , طبعا الرجال ذبها براس وزارة الداخليه ووزارة الامن القومي مدري شنو , هيج سالفه.

المهم , طلع مو صوج عبود قنبر.

اني طالع اليوم بالسياره , هم من دون كل السيارات كلولي اطبك وجوي ديفتشوني , حتى الجهاز ابو الاريل ما اشر عليه , بس يمكن شكلي مو راحه!

عراقي بالجيس

قنبر ذب الصوج براس وزير الداخليه , ووزير الداخليه ذبها براس الضباط
الهاشمي ذبها براس المالكي , والمالكي ذبها براس سوريا , سوريا تكول اني معليه اني بس اصدرلكم طماطه وخيار

يعني واحد ذبها براس اللاخ ,بقى بس اني والي ديقرا المقاله محد ذبها براسنه!, لكن بما ان الحرس لاحين وياي , فاتوقع اني هو المسئوول عن التفجيرات, وهذولي العراقيين الي ماتوا اني كاتلهم
تحياتي لكم

نفس الطاسه ونفس الحمام:حجب موقع كتابات

اهلا بكم في جمهوريتنا العزيزه جمهورية العربان

قد يسال البعض بما ان المدونه جديده , لماذا اخترت هذا الاسم, اعزائي القراء , ان جمهوريتنا الان "في الحقيقه منذ زمن بعيد" واصبح العربان يسيطرون على العراق الذي كان منارة للحضاره والشموخ الانساني.

العربان هي التسميه الي يطلقها اهل المدن العراقيه على البدو الرحل , وفي هاذا الزمن , هسه احنه العراقيين , الي متروسين شهادات وعلماء وشيوخ "عود شكد يفتهمون" يحكمونه العربان , وتخيلوا انتو مكان يحكموا رعاة اغنام بدون ثقافه شلون يصير.

بهاي المدونه راح يطلعون خياسنه

وعليش تتخيلون؟

هسه العراق يحكم من قبل ثله من العربان وصلوا الاوضاع الى درجات لم يصلها قبلا.

القائد المجاهد مع صوره خلفيه لجمهورية العربان بالوضع اليومي الاعتيادي

*يضهر معه علي يمين الصوره الرئيس الامريكي المشلوع العتيك بوش

على موضوعنه , احنه كيفنه راح السيد الرئيس القائد المجاهد قائد جمهورية ولد العم حتى نتحرر شويه , اشو طلعوا قادة جمهورية العربان نفس الشي.

اليوم تم حجب موقع كتابات لنقد جمهورية العربان , طبعا نقدهم اقوى من نقدي بقاطات , بس اني هم ما مقصر , انتو هم اذا شفتوني كم يوم كلشي مكاتب , كولو صاحبنه راح بالرجلين.

صاحب الموقع يذبها براس الحكومه , وبما انه احنه موقع مناصر لجمهورية العربان , فنحن نناصر الجمهوريه , ونكول للسيد رئيس الوزراء ,,,,,,روح والهوه بضهرك.

الرئيس متوجها بالحديث لمدونة جمهورية العربان

"انتو خوش اوادم, الله يكثر من امثالكم"

نفس الطاسه العتيكه , ورجعنه على نفس الحمام!

شويه هس ارحم , يمكن لان جمهوريتنا الرشيده ومجلس ال مصلخ ملتهين باللغف؟يعني فوك رواتبهم الخياليه , ومخصصاتهم الجباره , كامشيها لغف , المشكله اللغف صار موده , والكل تلغف بجمهوريتنا , ماواكع بيها غير الفقرا , و "الكم الله يا مكاريد"

الحكومه, هي شغله شغله صعبه واني الى هسه مافاهمها

هي هيج تبدي , وشويه شويه منشوف نفسنه الا جمهورية العربان تتحول الى جمهورية ابن العم مره ثانيه , ابن العم كان يخاف من الاعلام اشدما خوف , جانت عدنا 3 قنوات تلفزيون في غاية السخافه , ولمن يطلع يحجي بعد الله ميهده من المايكرفون , وجان الانترنت عباره عن كم موقع منزليها بسيرفر بالعراق ,اما الان فالربع مشتغلين على قدم وساق , يبوكون ويبوكون ويبوكون.

احنه شنكوللهم؟ بالعافيه , اكلو مادام العراقيين نايمين!

البرلمان العراقي:برلمان عشيرة ال مصلخ

انشئ البرلمان العراقي اول ما انشئ عام 1953 اي في العهد الملكي , وبعدها تم حله "بالفرك والشطف في الماء الفاتر" من قبل الرئيس

نوري السعيد , وقد هججهم كلهم بعد ان شاف انه ماكو فايده من وراهم,

هذا نوري السعيد

وراها سوه نوري السعيد انتخابات لخ , بس هالمره لعبها مضبوط وحطهم كلهم من ربعه , حتى محد يضوجهم , وعلى كولة المثل كلمن يحود النار لكرصته.

"نقلا عن جدتي الله يرحمها"

وره حرب الحواسم وبعد انتصار الرئيس القائد "حفظه الله ورعاه" بوش "هسه صار واحد مسودن يصيحوله اوباما" , بعد ان فاز بالمعركه الحاسمه , جاب ربعه حتى يحكمون ويا

سووا مجلس سموا "مجلس اللطم" اسف اقصد "مجلس الحكم الانتقالي"

وصار عدنه برلمانيات نسوان

برلمان عشيرة ال مصلخ الذي يحكم العراق الان ويقوم بالتشريعات المهمه , مثلا ذلك التشريع الذي يجعل راتب البرلماني 29200$ , فهم كما تعرفون يقودون جمهورية الرعيان بضل رب الرعيان وبتخويل من ممثليه ايات الله زرفاني كرشتنناي , ومحسن عبد الحميد راعي رعاة الغربيه , واحمد ابو ريشه او احمد ابو صوفه.

طبعا لايجب ان ننسى بالذكر رئيس عشيرة برلمان ال مصلخ , حاميها حراميها السيد ابراهيم السامرائي

ابراهيم السامرائي, رئيس عشيرة ال مصلخ

للاسف لم اجد راتب رئيس العشيره , لكن من يهتم فهي مع مجموع الملايين الاخرى التي تنهب من العراق.

صورة شيخ العشيره السابق

الصوره الموضوعه هي للشيخ السابق المصلخ محمود المشهداني  , وهو رجل مجنون بكافة مواصفات الجنون , ولديه اعراض لسته من الامراض النفسيه والعقد الاجتماعيه , التي يقال فيما يقال "عن ام احمد الحفافه" ان صدام حسين فوته للسجن مره , ومن طلع وهو شاخط هيج.

وين ماجنت يا محمود الله ربك , تخيلوا شكد لغف اثناء فترة رئاسته للعشيره؟

برلمان العشيره تسوده الفوضى والصراخ واللا انتظام في كافة الاوقات , فبعد كل شيئ هم برلمان لجمهورية الرعيان الاسلاميه

استراحة برلمان ال مصلخ

بعض القراء الان يضنون انني اقصد مصاليخ من الملابس , لكن هذا خاطئ جدا , فهم يمتلكون احدث وافخر انواع الملابس, ويمتلكون احدث السيارت "لعد فلوس العراقيين راحت ابخت منو؟"

لكنهم مصاليخ من كافة انواع الثقافه , كلش كافي تسمع حجيهم ومناقشاتهم الفكاكيه "من الفعل فك يفك", ويكفي انك تشوف عركاتهم الي تنقلها محطات التلفزه "قنوات التلفزيون" والي هي بمثابة اثبات انتماء لهويتهم المصلخيه.

مجموعه من ابناء عشيرة المصلخ

طبعا كل واحد ينطوا 20 مليون مخصصات حراسه , يخلي حراس 2 واحد ابن عمه واللاخ ابن عمه الثاني , ينطي كل واحد 300$ او € مادري بالضبط وياخذ الباقي

مجلس عشيرة ال مصلخ, لايتفقون سوى على الاختلاف , وهم على اختلافهم متفقون دائما, يكفي ان يطرح احدهم فكره , حتى يجابهه الجميع بالصراخ والصفير والعويل والشخير

في الحقيقه انهم علية قوم ال رعيان , ولديهم جميعا ختم الجوده والاعتماديه من الله.

ساروي لكم قصص ال مصلخ في مرات جايه , هسه تعبت واريد اروح انام

كان معكم تيم اثيل , من عاصمة جمهوري عربان , بغداد

قرار افتتاح مدونة الرعيان

قرار افتتاح جمهورية الرعيان:

نضرا لسيطرة الرعيان على وطننا العزيز , قررنا ان نفتتح مدونه لتداول اخبارهم , وطرائفهم التي اوصلت العراق الى قمة التطرف الديني والفساد الاداري , ومستوى امني لم تشهد له الدول مثيلا منذ ازمنة سحيقه.

هنا لدينا في جمهورية الرعيان التي تعاون على انشائها الدوله الاسلاميه الال سعوديه و طبع على مؤخرتها "جمهورية الرعيان" ساخت ايران , فاصبحنا بين معممين بعمائم بيضاء وبين معممين بعمائم سوداء.

دمتم بود

نسخه منه الى:

جمع من المواطنين , للاطلاع